Авторизация все шаблоны для dle на сайте newtemplates.ru скачать
 
  • 16:40 – Novruz bayramı münasibətilə ümumrayon tədbiri keçirilmişdir 
  • 13:45 – Rayon Uşaq-Gənclər Şahmat Məktəbində görüş keçirilmişdir 
  • 00:02 – Azərbaycanlılara qarşı ermənilərin soyqırım siyasəti 
  • 06:09 – Vergilər sahəsində maarifləndirici tədbirlər aparılır 

VƏTƏN SEVGİSİ YÜKSƏK OLAN YERDƏ... Sədərək ona görə qorunub

[xfgiven_gallery][xfvalue_gallery][/xfgiven_gallery]
Mətbuat işçisi, adətən, gec yatar və tez də yuxudan oyanar. Bu, onun peşə vərdişindən irəli gəlir. Ona görə də adətim üzrə yuxudan tez oyanmışdım. Yolumuz sərhəd bölgəsi olan Sədərək rayonuna idi. Avtomobilimiz Naxçıvan-Sədərək yoluna çıxanda ortayaşlı bir kişi avtomobilimizi saxlamağımızı işarə etdi. Hara getdiyimizi soruşdu. Sorğu-sualdan aydın oldu ki, Bakı-Naxçıvan təyyarəsindən təzəcə enib. Əslən Tərtərdəndir. Oğlu Ağaşirin 5 aydan çoxdur ki, Sədərəkdəki "N"saylı hərbi hissədə xidmət edir. Oğlunu görməyə gəlib. Yolumuz bir olduğundan Naxçıvanın qonağı olan Hümbəti özümüzlə götürdük.
Yolun rahat və gözəl görünüşü, bir-birıni əvəz edən valehedici mənzərələr, quruculuq ərməğanları Hümbəti öz sehrinə salmış, onu ovsunlamışdı. Odur ki, bu füsunkar tabloları baxışları ilə diqqətlə süzürdü. Ələlxüsus, yol boyu hərəkət edən maşınların gediş-gəlişinə xüsusi dıqqət yetirirdi. Bir qədər keçdikdən sonra ətrafımızdakı sükutu pozan Hümbət oldu:
- Mən özüm də sürücüyəm. Azərbaycanın əksər rayonlarında olmuşam. Ancaq sizin sürücülər kimi yol hərəkəti qaydalarına əməl etməyi birinci dəfədir ki, görürəm. Fikir verirəm, təhlükəsizlik kəmərini bağlamağı unudan yoxdur. Sürücülər maşını normal sürətlə sürürlər. Bir saatdır (Hava Limanından çıxdığı vaxtı da nəzərə alır) ki, yol gəlirəm, sürət həddini aşan bir sürücüyə rast gəlməmişəm.
Dedim ki, Naxçıvanda yol hərəkətinin təhlükəsizliyi ən vacib məsələlərdən biridir. Avtomobil yollarında yol hərəkəti qaydalarına ciddi riayət olunarsa, sərnişinlər də mənzil başına sağ-salamat çatarlar. Bu diyarda yolların abadlaşdırılması, magistral yolların yenidən qurulması bir tərəfdən yurdumuzu gözəlləşdirirsə, digər tərəfdən yollarda qəzaların sayının azalmasına səbəb olur. Yollar nə qədər rahat olsa, hərəkətin təhlükəsizliyi bir o qədər təmin edilər.
Qonağımızın muxtar diyarımızla çox maraqlandığını görüb sürücümüzdən xahiş etdim ki, Kəngərli rayonuna çatanda maşını saxlasın. Belə də etdik. Hümbətə muxtar respublikamızın ən gənc rayonu olan Kəngərli barədə məlumat verdik. Onu ulu öndər Heydər Əliyevin adını daşıyan Mədəniyyət və İstirahət Parkı, eləcə də rayonun gözoxşayan tikililəri ilə tanış etdik.
Arif üzünü mənə tutub muxtar respublikadakı bu sürətli inkişafın sirrinın nədə olduğunu soruşdu. Bildirdim ki, bu torpaqda müşahidə olunan sürətli inkişafın kökündə ümummilli liderimiz Heydər Əliyevin yoluna, siyasi və nəzəri irsinə böyük sədaqət və ehtiram dayanır. Siz bu sədaqətin nümunələrini muxtar respublikamızın sərhəd bölgəsi Sədərəkdə də görəcəksiniz.
Hümbət bildirdi ki, Sədərəyi görməsə də, oğlu Ağaşirin bu yerlər haqqında ona bəzi məlumatlar verib. Sədərəklilərin mərd, qonaqpərvər və cəfakeş olduğunu xüsusilə vurğulayıb.
Bir azdan gözlərimiz önündə Mil dağının ətəyinə sığınan, bir gözəllik mücəssəməsi olan Heydərabad qəsəbəsi görünür. Üzümü Hümbətə tutub deyirəm:
- Bu da bizim Naxçıvanın qeyrət qalası Sədərək. Bu, o qaladır ki, düşmənin itilənmiş tamah dişi burada sındırılıb. Erməni daşnaklarının həmlələri və minbir hiyləsinin qarşısı bu qalada Vətən oğulları tərəfindən mərdliklə alınıb. Sədərək muxtar respublikamızın digər sərhəd məntəqələrindən daha çox erməni hücumuna məruz qalıb.
1992-ci ilin may ayının əvvəllərində Naxçıvan Muxtar Respublikasında Azərbaycanın Ermənistanla sərhədlərində gərginlik artmışdı. Erməni daşnakları hətta zəhərli kimyəvi silahlardan istifadə edirdilər. Sədərəkdə qanlı döyüşlər 40 gün davam etdi. Naxçıvanlıların hamısı Sədərəyin müdafiəsinə qalxdı. Onlar qəhrəmanlıqla vuruşurdular. Kəndlərə xeyli ziyan dəymiş, evlər və inzibati binalar dağıdılmışdı. On minlərlə insan ağır şəraitdə yaşamağa məcbur olmuşdu. İndi həmin günlər arxada qalıb. Yeri gəlmişkən qeyd edim ki, ulu öndərimizin fəaliyyəti sayəsində 1991-ci il sentyabr ayının 7-də Naxçıvan Muxtar Respublikası Dövlət Müdafiə Komitəsinin yaradılması ilə bugünkü Silahlı Qüvvələrimizin təməli qoyuldu. Deyirlər, hər bir xalqı dünyada söz sahibinə çevirən amillərdən biri onun Silahlı Qüvvələridir. Hər bir müstəqil dövlət öz güclü ordusu ilə tanınır. Ordusu olmayan xalqın xoşbəxtliyi də ola bilməz. Bu gün xalqımız xoşbəxtdir ki, onun güclü ordusu var.
Mənim bu sözlərim Hümbətin də ürəyindən xəbər verdı:
-Hər bir Vətən oğlu zamanı yetişəndə Vətənə övladlıq borcunu verməlidir. Bu gün sevinirəm ki, oğlum Ağaşirin də bu borcu yerinə yetirir. Özü də o yerdə ki, Vətən oradan başlanır. Torpaqlarımızın müdafiəsində ayıq-sayıq duran övladlarımızla qürur duyuram.
Heydərabad qəsəbəsi ilə tanışlıqdan sonra "N"saylı hərbi hissəyə yollandıq, Ağaşirinlə görüşdük.
Öyrəndik ki, 2018-ci ilin iyul ayından ordu sıralarına çağırılıb. Xarakterində də ciddi dəyişikliklər əmələ gəlib. Gənc əsgər daha əvvəlki kimi özünü yeniyetmə saymır. Təlimdə komandirlərinin göstərişlərini sözsüz və can-başla yerinə yetirməsi onun vətənpərvər bir əsgər olduğundan xəbər verirdi. Ona belə bir sualla müraciət etdim:
- Ağaşirin, səncə, vətənpərvərlik nə deməkdir? Ağaşirin bu suala özünəməxsus şəkildə cavab verdi:
- Vətənpərvərlik, ən sadə mənası ilə desək, Vətəni sevmək və lazım gələrsə, onun yolunda canından keçməkdir. Bu gün cəmiyyətimizdə, insanlar arasında, eləcə də ordumuzda bu mövzudan çox söz açılır. Azərbaycan torpaqlarının 20 faizinin işğal altında olduğu bir vaxtda hər bir gəncin, yeniyetmənin vətənpərvərlik ruhunda köklənməsi vacibdir. Doğulub boya-başa çatdığımız, ən ülvi hisslərlə bağlandığımız Vətənin bir parçası xain ermənilərin əlindədir. Belə bir vaxtda heç bir gəncin ölkəmizdə gedən ictimai-siyasi proseslərdən kənarda qalmağa mənəvi haqqı yoxdur. Axı xalqımızın bizə inamı böyükdür. Ona görə də bir döyüşçü kimi yetişməyimiz vacib şərtdir. Komandirlərimizin də əsas məqsədi odur ki, hər bir əsgər vətənpərvər kimi yetişsin. Sevinirəm ki, mənimlə birlikdə xidmət edən yoldaşlarım belə gənclərdir. Ona görə də sərhədlərimiz göz bəbəyi kimi qorunur. Bu da sərhəd məntəqəsində yaşayan insanların qurub-yaratmaq əzmini yüksəldir. İndi Naxçıvanın qeyrət qalası daha böyük güclə, mərdliklə, möhkəm iradə ilə qorunur. Bu gün hər bir əsgər öz səngərində daha ayıq-sayıq və daha çevikdir. Onu heç bir güllə səsi qorxuda bilməz. Çünki biz öz xidmətimizi yüksək nizam-intizam, qarşılıqlı hörmət və Vətənə sonsuz məhəbbət əsasında qurmuşuq.
Oğlunun bu torpaqda əsl vətənpərvər kimi yetişməsi ata qəlbini də vəcdə gətirmişdi. Odur ki, ata-bala bir-birinə sarıldılar.
Onunla və atası ilə sağollaşıb ayrıldıq. Bu görüş, əsgər və atasının söhbətləri məni və sürücünü xeyli təsirləndirmişdi. Sanki Sədərəyə nə üçün gəldiyimizi unutmuşduq. Həm də sevinirdim ki, daha bir mövzu, necə deyərlər, məni özü tapmışdı. Düşünürdüm ki, bu gün xalqımız öz ordusuna güvənir. İndi bu ordunun müdafiə edə bilməyəcəyi torpaq, məğlub edə bilməyəcəyi düşmən yoxdur. Naxçıvan Muxtar Respublikası Ali Məclisi Sədrinin söylədiyi kimi: “Hər birimiz bilməliyik ki, birlik harada varsa, güc və qüdrət də oradadır. Birlik, dostluq və bərabərlik düşmən qarşısında şərəf və ləyaqətlə dayanmağın əsasıdır. Bu amal həm də böyük ruh yüksəkliyi, yük­sək əhval-ruhiyyə deməkdir”.
P.S. Aradan bir müddət keçdikdən sonra Hümbətdən minnətdarlıq məktubu gəldi. O yazırdı:
"Hörmətli redaksiya! Bir neçə gün sədərəklilərin qonağı oldum. Düşmənə gözdağı olan, bura gələn insanları öz gözəlliyi ilə məftun edən Heydərabadı qarış-qarış gəzdim. Burada zəhmətin nurunu gördüm. Ömrünü torpağa bağlayan, alın təri ilə çörək qazanan insanların qonaqpərvərliyi məni heyran etdi. Atalar sözüdür: "Torpağa əyiləni torpaq ucaldar". İndi mənə aydın oldu ki, bu torpaq necə qorunub. Çünki bu diyarda yurd sevgisi, torpaq sevgisi hər şeydən ucada dayanır. Sədərəyi ülvi gözəlliyə, gülüstana çevirənlərə dərin minnətdarlığımı bildirirəm. Azərbaycanımızın ayrılmaz parçası olan Naxçıvanı nəinki rayonumuza, eləcə də bütün bölgələrimizə örnək sayıram".


Rövşən HÜSEYNOV,
Mətbuat Şurasının sədri
рейтинг: 
Оставить комментарий
  • Комментируют
  • Сегодня
  • Читаемое
Мы в соцсетях
  • Вконтакте
  • Facebook
  • Twitter